Etiqueta: Franquismo

  • O enfoque legalista da guerra civil

    O enfoque legalista da guerra civil

    No debate sobre a guerra civil, de cuxo final se acaban de cumprir 80 anos, dominan dúas posturas enfrontadas: a dos valedores das teses franquistas e a dos que argumentan que a culpa estivo repartida entre os dous bandos.

    A tese legalista sostén que parte das forzas republicanas mantiñan posturas revolucionarias e que non respectaban a propia legalidade republicana, algo que, por certo, tampouco facía parte da dereita.

    O máximo expoñente desta falta de respecto á lei por parte das forzas da República sería a tentativa revolucionaria de 1934. A iso Josep Fontana ten respondido que, coa mesma lóxica, habería que mencionar o intento de golpe de Sanjurjo no 32.

    Escrutinio nunha mesa mesa electoral en febreiro de 1936.

    Así formulado o debate, desde a óptica legalista, fai que este se limite á parte máis visíbel da política, a institucional, esquecendo que as posturas revolucionarias son acollidas por un amplo sector social a causa da intransixencia da oligarquía que sempre se opuxo a dúas medidas: a reforma agraria e os Estatutos. Sen resolver este grave problema estrutural era imposíbel que a legalidade funcionase normalmente.

    É recoñecido por todos que a dereita española non aceptaba, por suposto, a revolución, pero tampouco o gradualismo. “Comede república”, dicíanlle aos xornaleiros. Para as clases baixas as reformas eran unha cuestión de supervivencia. Foi esa falta de reformas a que abocou a un sector á revolución. Non era, por outra parte, posíbel agardar indefinidamente, máxime cando durante o Bienio Negro viran como a dereita volvía atrás todas as reformas, por mínimas e razoábeis que fosen. Así, o anticlericalismo, salvo excepcións, non era tal, senón laicismo, con creación de escolas mixtas, para nenos e nenas. A postura contra os Estatutos era igual de intransixente, con negativas a todo diálogo.

    Cartelería electoral en 1936 do lider da dereita José María Gil Robles.

    Hai que ter en conta, ademais, que parte da dereita e a propia CEDA profesaban un republicanismo dubidoso ou mesmo eran claramente contrarios. A CEDA defendía a chegada do Estado corporativo (tipo Italia) pola vía parlamentar. A Gil Robles recibíano con berros de: jefe, jefe, cal Mussolini, e as súas mocidades, as JAP, acabaron entrando maioritariamente na Falanxe. As súas simpatías fascistas non eran nada secretas, como por outra parte tampouco o eran as de Calvo Sotelo.

    Pola contra, as forzas republicanas eran maioritariamente legalistas, tanto no que respecta a Azaña (Izquierda Republicana), como a boa parte do PSOE, coa excepción dos largocaballeristas. No bando republicano había burgueses, socialdemócratas e revolucionarios. Estes últimos de dous tipos: os comunistas que defendían a democracia e a legalidade e así o fixeron durante a guerra, aínda que a consideraban unha fase previa de acumulación de forzas cara a revolución; e por outra parte os anarquistas que defendían a revolución inmediata.

    Pero, en todo caso, o importante é que os gobernos da República estaban basicamente en mans do sector burgués e ultralegalista e contaban con pouca participación socialista e menos aínda do resto de forzas á esquerda. Isto viuse en Casas Viejas (manipulación dalgún xefe da garda civil, logo golpista, aparte), no programa moderado da Fronte Popular e nas medidas de goberno, decididas, pero razoábeis e tamén gradualistas, medidas que daban idea de reformismo burgués non de revolución proletaria. Algo que se pode comprobar, por exemplo, vendo o programa da reforma agraria, semellante ao que xa se aplicara con éxito noutros países europeos.

    Os gobernos da República estaban basicamente en mans do sector burgués e ultralegalista e contaban con pouca participación socialista e menos aínda do resto de forzas á esquerda

    Este legalismo, mesmo excesivo, tivo parte da culpa de que a sublevación militar non fose derrotada nos seus inicios. De Casares Quiroga fíxose célebre a frase: “se os militares se levantan eu voume durmir”, e a orde, igual á que deron outros ministros, de fusilar o sindicalista que se fixese con armas.

    Mitin de Manuel Azaña.

    Practicamente todos os gobernadores civís, columna vertebral do Goberno, mantiveron a mesma liña de non entregar armas aos que lles deran o voto e iso estivo na orixe da derrota, como explica Antony Beevor. Por iso, o Goberno foi acusado, durante aqueles primeiros días decisivos, de traidor por moitos cidadáns.

    Os poderes republicanos actuaron en virtude da súa procedencia social e porque finalmente pesou máis neles o medo aos traballadores que aos militares sublevados. Unha actitude que lembra a do Goberno alemán no 18. A pesar diso, foron bastantes os burgueses e militares leais que pagaron coa súa vida a fidelidade á República.

    Por último, hai que contar coa postura de alemáns e italianos. Sen a ponte aérea dos junkers 52 tería sido imposíbel o desembarco do exército de África na península. Pero tamén foi decisiva a postura de ingleses e norteamericanos que, desde o primeiro momento, consideraron que a de España non era, primordialmente, unha loita entre democracia e totalitarismo, senón entre burgueses ultraconservadores e unha alianza reformista-revolucionaria.

    Podemos aprender algo desta época? Salvando as diferenzas obvias, quizais a dereita está volvéndose de novo intransixente.

    Podemos aprender algo desta época? Salvando as diferenzas obvias, quizais a dereita está volvéndose de novo intransixente. Tamén podemos ver que os problemas de fondo, como é agora sobre todo o territorial, non se poden arranxar co recurso único á legalidade. Como di Beevor, “a historia de España ensina que a legalidade foi, moitas veces, tan só un termo arbitrario e subxectivo, pouco máis que un eufemismo para enmascarar o dereito de conquista e a vontade de instalarse por longo tempo no poder” (A guerra civil española, p. 80).

  • Cando Franco lle regalou o Gordo de Nadal a Barrié

    Cando Franco lle regalou o Gordo de Nadal a Barrié

    No 1963, no seu discurso de inauguración do Salto de Belesar, o xeneral Francisco Franco, afirma que este se construíu “utilizando o aforro rexional”. Unha mención certa e, ao mesmo tempo, estraña na boca do xeneral, se non se coñecen outros episodios e rumores sobre a procedencia do diñeiro: o gordo da Lotería Nacional.

    O alcalde da Coruña, á esquerda, Alfonso Molina, Pedro Barrié de la Maza e Francisco Franco.

    A Pedro Barrié de la Maza tocáranlle no sorteo de Nadal do 22 de decembro de 1958, 180 millóns de pesetas, algo así como a metade do que custou a obra de Belesar.

    Pedro Barrié de La Maza, encargara as seis series do 33.704, isto é, o número completo. Fontes da familia do Conde dinme que era “para repartir entre os traballadores, pero que estes non quixeron a lotería”.

    Doce días antes do sorteo, a Lotería española poñía á venda unha serie máis.

    Unha serie adicional, no número escollido por Barrié, que, deuse a casualidade que foi parar, integramente, ao Colexio de Orfos da Garda Civil. Outros, mal pensados, que non cren na sorte nin na casualidade, e menos aínda co ditador de por medio, falan de diferenzas e enfrontamentos dentro do Exército, e esa serie dos “orfos” sería un xeito de “compensación” de Franco para taparlles a boca polo premio ao seu amigo Barrié. Cuestión de estado, digamos, con palabras de hoxe.

    Segundo a investigación realizada polo xornalista Gustavo Luca de Tena, logo do sorteo da Lotería, podemos serguir nas hemerotecas unha estratexia de información precisa e estudada: nos primeiros tres días, silencio e rumores. O día 26 de decembro de 1958 espallan un bulo pola axencia de noticias Cifra que recollen todos os medios: o gordo tocoulle a un emigrante coruñés, Jesús Deibe, que vive en Nova York.

    O mesmo día 26 aparece unha coda: Deibe ten unha noiva en Barallobre e vai casar con ela e repartir os cartos entre os traballadores da Ría do Ferrol.

    Este bulo podería ter saído do mesmo despacho de Barrié: os dous basilares do grupo Pastor son os Dalmau (fundadores) e Pedro Barrié (protagonista da súa expansión) D&B=deibe.

    A noiva de Barallobre sería Astano, naquel intre en serios problemas económicos.

    O día dos calotes, 28 de decembro, o peiteador Minguela chama a El Pueblo Gallego (xornal de Vigo que fora propiedade de Manuel Portela Valladares, daquela en mans da Prensa del Movimiento) e anuncia que o premio lle correspondeu a un turista brasileiro, João Baptista Alexandre, que marchara o mesmo día do sorteo no buque Cabo de Hornos para San Salvador de Baía.

    Minguela conta que o turista, amigo seu, deixara amplas propinas no salón de peiteado.

    Os reporteiros de El Pueblo Gallego fotografan varios billetes de mil pesetas supostamente deixados polo João Baptista no local de Minguela.

    O calote custoulle un susto ao Minguela. O director do xornal denunciao por “roxo e masón”. Bromas, as xustas, e coas cousas de comer non se xoga.

    As series no Banco Pastor

    A prensa tardou en dar unha mínima noticia, e preferiuse deixar todo en rumor. Velaquí a breve noticia no ABC de 30 de decembro de 1958.

    O 29 de decembro, a axencia Cifra anuncia que o premio puido tocarlle a Pedro Barrié. A mesma axencia confirma ao día seguinte que as seis series están depositadas no Banco Pastor de A Coruña.

    Toda a prensa inclúe na información este parágrafo: “asegúrase que o diñeiro será empregado en beneficio de Galicia e, concretamente, na Coruña”.

    Hai que quere atopar nesta frase unha xustificación do Conde amigo de Franco.

    A súa dona e sucesora, Carmela Arias, repetiría, máis ou menos esta frase con ocasión do centenario do nacemento de Pedro Barrié: “tocoulle o gordo, pero foi para beneficio de Galicia”.

    Carmela Arias afirmaba con ocasión do centenario do nacemento de Pedro Barrié: “tocoulle o gordo, pero foi para beneficio de Galicia”.

    A crise de 1957

    O certo é que, cando Fenosa comeza a construción do encoro de Belesar, no 1957, o Estado español pasaba por unha grande crise económica e semellaba que nin as arcas de Barrié, nin as do Estado, estaban para construír daquelas o salto máis grande e moderno de Europa.

    Na obra El Franquismo, de Giuliana Di Febo e Santos Juliá esta crise de 1957 aparece descrita como segue: “No 1957, os desequilibrios e estrangulamentos provocados pola coexistencia da vella inercia autárquica coas medidas liberalizadoras tomadas desde 1951, tiñan levado a economía española a unha situación de bancarrota: non había divisas para facerlle fronte ao pagamento de importacións. Esgotamento das reservas, déficit da balanza de pagamentos, aumentos salariais pronto superados por unha inflación galopante, protestas estudantís, malestar social e folgas en Madrid, Asturias e Barcelona. Todo se aliou para provocar unha crise de goberno no 1957. (O Opus Dei toma o temón do Estado franquista)”.

    Un dos cargos que traballaron naquela época na construción do encoro de Belesar, afirma que, cando comezaron as obras, Dragados lle tivo que deixar diñeiro algúns meses a Fenosa para poder realizar o pagamento das nóminas. Feito que non puidemos contrastar en fontes da empresa nin nos seus libros de contabilidade. Pero a nosa fonte é de toda solvencia.

    No libro de José Luis García Delgado, Electra y el Estado, explícase que o enorme investimento esixido polos encoros do Sil e do Miño levaron ao Grupo Pastor a unha situación extrema, sobre todo logo da aparición da tarifa única: Galiza xa era excedentaria en enerxía, pero o dominio da distribución era vasco, madrileño e catalán.

    Hidrola e a Unión Eléctrica Española só recibían o excedente de Fenosa cando a demanda superaba a súa propia produción. Despois pretendían que o excedente de electricidade dos encoros galegos debía ser considerado “ben libre”, posto que, argumentaban, ao non ser usada a electricidade en Galiza, perdíase.

    E se se perdía, para que lle tiñan que pagar a Fenosa por ela.

    Hai que ter en conta que o Réxime de Franco era debedor e se apoiaba nas grandes empresas eléctricas que, aínda hoxe, seguen a marcar moi moito a política do Estado, pois os accionistas de referencia son as familias da grande oligarquía española.

    Franco nin podía nin quería ir directamente contra os grandes oligopolios eléctricos, pero tampouco podía deixar que se afundise o seu amigo Pedro Barrié, que tanto fixera por el, entre outras cousas, regalándolle o Pazo de Meirás e a Casa Cornide.

    Os crentes afirman que Deus volve pola verdade e axuda a quen se axudan. Outros falarán da sorte dos arriscados. E, algúns que están de volta das novas, pensan tamén que Francisco Franco axudaba a quen o axudara.

    Un sorteo que, por primeira vez non foi público

    O sorteo de Nadal de 1958 non foi público por primeira vez desde a institución da Lotería de Nadal en 1763. Circunstancia que, noutro Réxime, o invalidaría legalmente.

    Na porta do salón de sorteos naquel 22 de decembro de 1958, formárase unha ringleira de xente provista dun pase estendido polo director Xeral de Tributos Especiais, Francisco Rodríguez Cirugeda.

    Entraron no salón do sorteo reporteiros e fotógrafos dos diarios e cámaras do No-Do. Cámaras e focos que foran autorizados por vez primeira o ano anterior.

    O sorteo de Nadal de 1958 non foi público por primeira vez desde a institución da Lotería de Nadal en 1763.

    Tamén no 1957 se dera a novidade de figurar como presidente do sorteo o Director Xeral de Tributos Especiais, asistido polo xefe de sección de Loterías, Rafael Alonso González. Completan a mesa un interventor de Facenda e o concelleiro de Madrid, Luís Álvarez Molina.

    Rodríguez Cirugeda aparece recibido en audiencia por Francisco Franco ese ano de 1957.

    O premio Gordo que lle tocou a Barrié, saíu ás 10,49 horas, mentres se xogaba a Cuarta Táboa.

    Os únicos incidentes citados nas crónicas dos diarios son a caída dunha bola ao chan que foi recollida por un dos rapaces cantores do colexio de San Ildefnso e a potencia dos focos do No-Do.

    Na crónica de La Vanguardia afírmase que os rapaces de San Ildefonso teñen que facer a viseira coa man par poder ler as bolas.

    Como fixeron a trampa? Iso non se sabe. Polo menos nós.

Boletín de novidades

Recibe as novas no teu e-mail


Política de privacidade *