Desde hoxe está completa a dixitalización e o acceso público a todos os números de A Nosa Terra, culminando un acordo técnico asinado entre a Fundación A Nosa Terra e o Consello da Cultura Galega. Renacida en 1977, a edición contemporánea desta cabeceira nacida en 1907, percorre máis de tres décadas de abordaxe xornalística da realidade galega, no complexo periodo histórico da restauración democrática e a recuperación de dereitos nacionais.
O modo de acceso e procura está destacado sempre na portada da edición online. Pódese consultar número a número, ler en liña ou baixar ao ordenador ou teléfono para unha consulta máis demorada. Ao tempo a páxina de A Nosa Terra actualiza contidos periodicamente, con informacións e colaboracions, tanto de redacción propia como de contidos tirados dos milleiros de páxinas realizadas durante trinta anos, produto do esforzo dun ronsel de xornalistas, colaboradores e accionistas, que mantiveron sempre vivo o obxecto fundacional enunciado no número 0: “temos a intención de levar adiante un traballo que responda ao dereito de informar con rigor, simpatía e posicións críticas dos feitos que se relacionan co noso pobo. A Nosa Terra, ao definirse como un periódico de linea nacionalista fai, tamén, unha elección comprometida coa gran maioría, coas clases populares, na loita da semente por ser frol“.
Ponse así o ramo á etapa que a Fundación A Nosa Terra considerou máis urxente. No futuro engadiremos á Hemeroteca todas as publicacións das series especiais: A Nosa Cultura, A Nosa Historia e Cadernos de Pensamento e Cultura. Ao cabo todas estas páxinas son o froito real e aínda útil de todo medio de comunicación.
